काठमाडौं । काठमाडौं महानगरपालिकाका मेयर तथा स्वतन्त्र राजनीतिक व्यक्तित्वका रूपमा चर्चित बालेन्द्र (बालेन) साह औपचारिक रूपमा दलीय राजनीतिमा प्रवेश गरेका छन्। राष्ट्रिय स्वतन्त्र पार्टी (रास्वपा) भित्र बालेन पक्षीय नेताहरूको संगठित प्रवेशसँगै पार्टीको केन्द्रीय संरचनामा उल्लेख्य फेरबदल देखिएको छ।
रास्वपाले बालेन साहलाई वरिष्ठ नेताको जिम्मेवारीसहित केन्द्रीय भूमिकामा समेट्दै बालेन पक्षीय २६ जनालाई केन्द्रीय सदस्यका रूपमा पार्टीमा थप गरेको हो। लामो समयदेखि वैकल्पिक राजनीति, सुशासन र भ्रष्टाचारविरुद्धको एजेन्डामा सहकार्य गर्दै आएका पात्रहरू रास्वपाको केन्द्रीय संरचनामा पुगेपछि नेपाली राजनीतिमा नयाँ तरंग पैदा भएको छ।
रास्वपामा थपिएका बालेन पक्षीय केन्द्रीय सदस्यहरू यस्ता छन् :
वरिष्ठ नेता बालेन्द्र साह, सुनिल लम्साल, भुपदेव शाह, सस्मित पोखरेल, सागर ढकाल, लक्ष्मण थारु, रमेश पौडेल, खगेन्द्र सुनार, गणेश पौडेल, सन्तोष गिरी, नमिता यादव, सरिता ज्ञवाली, जेम्स कार्की, सुशान्त वैद्य, लक्ष्मी बर्देवा, शिव यादव, रोहन कार्की, अनन्तराज घिमिरे, रामकुमार ढुंगाना, प्रदीप ज्ञवाली, मधुसुधन ढकाल, ओजश्वी थापा, केपी खनाल, आदित्य आचार्य, प्रदीप पाण्डे र खेमराज साउद रहेका छन्।
वैकल्पिक राजनीतिमा नयाँ समीकरण
बालेन साहको दलीय राजनीतिमा प्रवेशलाई वैकल्पिक राजनीति र युवा केन्द्रित राजनीतिक धारको संस्थागत विस्तारका रूपमा हेरिएको छ। काठमाडौं महानगरमा देखाएको कार्यशैली, प्रशासनिक कडाइ र प्रत्यक्ष जनमुखी कदमले बालेनलाई राष्ट्रिय स्तरको राजनीतिक पात्र बनाएको विश्लेषकहरूको भनाइ छ।
रास्वपा नेतृत्वले बालेन साहसहित आएका नेताहरूले पार्टीलाई सुशासन, पारदर्शिता र डेलिभरीमुखी राजनीतितर्फ अझ मजबुत बनाउने विश्वास व्यक्त गरेको छ। आगामी निर्वाचन र राष्ट्रिय राजनीतिक समीकरणमा यसको प्रभाव पर्ने अनुमान पनि गर्न थालिएको छ।
राजनीतिमा असर के होला ?
बालेन साहको औपचारिक दलीय यात्रा सुरु भएसँगै स्वतन्त्र राजनीतिमा विश्वास गर्ने समूह, शहरी मतदाता र युवा पुस्ताको आकर्षण रास्वपातर्फ बढ्ने संकेत देखिएको छ। यसले परम्परागत दलहरूलाई समेत नयाँ रणनीति बनाउन बाध्य पार्न सक्ने विश्लेषण गरिएको छ।
