८५ वर्षमा व्यवस्था फेरियो तर सत्ताको चरित्र फेरिएन: बालेन शाह

काठमाडौँ । काठमाडौँ महानगरपालिकाका प्रमुख बालेन्द्र शाह (बालेन) ले नेपालमा पटक-पटक राजनीतिक व्यवस्था परिवर्तन भए पनि सत्ताको चरित्र परिवर्तन हुन नसकेको टिप्पणी गर्नुभएको छ। शहीद दिवसको अवसरमा सामाजिक सञ्जालमार्फत भावपूर्ण श्रद्धाञ्जली व्यक्त गर्दै उहाँले शहीदका सपना अझै अधुरै रहेको उल्लेख गर्नुभएको हो।
प्रमुख शाहले ८५ वर्षअघि राणा शासनको अन्त्यका लागि जीवन आहुति दिने चार शहीदहरू— गंगालाल श्रेष्ठ, दशरथ चन्द, धर्मभक्त माथेमा र शुक्रराज शास्त्रीको स्मरण गर्दै तत्कालीन राज्यको क्रूरताको चर्चा गर्नुभएको छ।
‘शहीदका सपना अझै पुरा भएनन्’
बालेनले २००७ सालमा राणा शासन अन्त्य भए पनि राज्य वास्तविक रूपमा जनताको बन्न नसकेको गुनासो गर्नुभएको छ। उहाँले भन्नुभएको छ, “८५ वर्षमा पटक-पटक व्यवस्था फेरियो, सत्ताको चरित्र फेरिएन। पटक-पटक नेपाली जनता शहीद भए तर शहीदका सपना पुरा हुन सकेनन्।”
उहाँले हालैको भदौमा भएको ‘जेनजी’ (Gen-Z) आन्दोलनलाई जोड्दै सुशासन र भ्रष्टाचार अन्त्यको माग राखेर शान्तिपूर्ण आन्दोलनमा उत्रिएका युवाहरूले फेरि बलिदान दिनुपरेकोमा दुःख व्यक्त गर्नुभएको छ।
सुशासन र दलीयकरणको अन्त्यमा जोड
प्रमुख शाहले अबको मुख्य दायित्व भ्रष्टाचारको अन्त्य र आर्थिक रूपमा उन्नत मुलुक बनाउनु रहेको बताउनुभएको छ। उहाँले राज्यका निकायहरूमा व्याप्त ‘चरम दलीयकरण’ को अन्त्य हुनुपर्नेमा विशेष जोड दिनुभएको छ।
> “राज्यका निकायहरूमा भएको चरम दलीयकरणको अन्त्य गर्दै राज्यलाई जवाफदेही र पारदर्शी बनाउनुपर्ने दायित्व हामीसँग छ। यी शहीदहरुको बलिदानीलाई बेवास्ता गर्ने छुट अब हामी कसैलाई छैन।” – बालेन शाह
>
अब कसैले शहीद बन्नु नपरोस्
बालेनले यस वर्षको शहीद दिवसलाई शहीदहरूको बलिदानी सार्थक पार्न मन, वचन र कर्मले प्रतिबद्ध हुने समयको रूपमा व्याख्या गर्नुभएको छ। उहाँले भन्नुभएको छ, “अब समय आएको छ— शहीदका रगतलाई सम्मान गर्दै वहाँहरूको सपना पुरा गर्ने। सुशासनयुक्त, भ्रष्टाचारमुक्त देश बनाउने। फेरि कसैले शहीद बन्नु नपरोस्!”
महानगर प्रमुख शाहले सम्पूर्ण ज्ञात-अज्ञात शहीदहरूप्रति भावपूर्ण श्रद्धाञ्जली र सम्मान व्यक्त गर्दै आफ्नो धारणा टुङ्ग्याउनुभएको छ।