काठमाडौं, मंसिर १, २०८२ — नेपाली क्रिकेट प्रेमीहरूका लागि प्रतीक्षित नेपाल प्रिमियर लिग (एनपीएल)–२०२५ आजदेखि राजधानीको त्रिभुवन विश्वविद्यालय अन्तर्राष्ट्रिय क्रिकेट मैदान, किर्तिपुरमा धमाकेदार रूपमा सुरु हुने भएको छ। आठ फ्रेन्चाइज टिम सहभागी रहने टी–२० ढाँचाको यो लिग आगामी डिसेम्बर १३ एवम् मंसिर २७ सम्म निरन्तर चल्नेछ।
उद्घाटन खेलमा आज जनकपुर बोल्ट्स र काठमाडौं गोरखाजबीच दिउँसो ३:४५ बजे भिडन्त हुनेछ। क्रिकेट विश्लेषकहरूले दोस्रो संस्करण पहिलोभन्दा अझै रोमाञ्चक र प्रतिस्पर्धात्मक हुने अपेक्षा व्यक्त गरेका छन्। यो पालि त रातिमा पनि खेल्नको लागि फ्लडलाईटको व्यवस्था छ।
जनकपुर बोल्ट्स, काठमाडौं गोरखा, चितवन राइनोज, कर्णाली याक्स, बिराटनगर किंग्स, पोखरा भेन्जर्स, लुम्बिनी लायन्स, सुदूरपश्चिम रॉयल्स अर्थात् आठ टिमहरुबीच प्रतिस्पर्धा हुनेछ।
गत वर्षको विजेता टिम बिराटनगर किंग्स यस पटक पनि उपाधिको दाबेदार मानिएको छ। यद्यपि काठमाडौं गोरखा र जनकपुर बोल्ट्स जस्ता टिमहरूले कडा चुनौती दिने अनुमान समीक्षकहरूले गरेका छन्।
यस संस्करणमा नेपाली स्टार खेलाडीहरू—दीपेन्द्र सिंह ऐरी, सन्दीप लामिछाने, कुशल भुर्तेल लगायत मौजूद रहँदैछन्। साथै विदेशी खेलाडीहरूको सहभागिताले लिगको स्तर झनै उकास्ने बताइएको छ। जनकपुर बोल्ट्सको पक्षमा स्कट कुग्गेलाइनजस्ता अन्तर्राष्ट्रिय क्रिकेटरको आगमनले पनि ध्यान तानेको छ।
किर्तिपुर मैदानमा नयाँ सुविधा
एनपीएलका लागि किर्तिपुर स्थित त्रिभुवन विश्वविद्यालय अन्तर्राष्ट्रिय क्रिकेट मैदानलाई विशेष रूपमा तयारी गरिएको छ। पिच सुधार, दर्शक बासस्थान तथा अन्य प्राविधिक सुविधामा यसपटक थप सुधार गरिएको आयोजक पक्षले जनाएको छ।
क्रिकेट एसोसिएसन अफ नेपाल (CAN) का अनुसार, यस लिगमार्फत युवा खेलाडीहरूलाई अन्तर्राष्ट्रिय अनुभव र एक्सपोजर दिलाउने लक्ष्य राखिएको छ।
दर्शक उत्साह उच्च स्तरमा
सोसल मिडियामा ‘NPL Season 2 Loading…’ जस्ता ह्यासट्यागहरू ट्रेन्डिङ छन्। टिकट बिक्री खुला गरेको केहि समयमै सकिएको छ र विश्वभरबाट नेपाली दर्शकहरूले लाइभ स्ट्रिमिङमार्फत खेल हेर्न सक्ने व्यवस्था मिलाइएका छ।
NPL लाई नेपाली क्रिकेटलाई व्यावसायिकता, बजार र लोकप्रियतामा उकास्ने महत्वपूर्ण अवसरको रूपमा हेरिएको छ। आजदेखि शुरू भएको यो २७ दिन लामो क्रिकेट महाकुम्भले देशभर नै खेलप्रेमीहरूको ध्यान तान्ने अपेक्षा गरिएको छ।
