दार्चुला — अपिहिमाल गाउँपालिका र मार्मा गाउँपालिकाबीच कार्तिक ३० गते (हिजो) सम्पन्न अन्तरपालिका समन्वय बैठकले दुई पालिकाबीचको पारस्परिक सहकार्य र साझेदारीलाई थप सुदृढ बनाएको छ। बैठकले पर्यटन प्रवर्द्धनदेखि विपद् व्यवस्थापनसम्मका विषयमा महत्वपूर्ण निर्णय गर्दै दुवै पालिकाबीच कार्यान्वयनयोग्य योजना अघि बढाउने सहमति जनाएको छ।
बैठकमा पालिकाहरूबीचको असल अभ्यास आदानप्रदान, पर्यटन विकास, प्राकृतिक स्रोतको उपयोग, सीमा व्यवस्थापन, तथा विपद् जोखिम न्यूनीकरण जस्ता मुद्दामा विस्तृत छलफल भएको थियो। विशेषगरी भौगोलिक रूपले संवेदनशील र पर्यटन सम्भावनाले भरिपूर्ण क्षेत्र भएकाले दुवै स्थानीय तहले संयुक्त रूपमा अघि बढ्नुपर्ने आवश्यकता औंल्याइएको अपिहिमाल गाउँपालिका अध्यक्ष भगत सिंह ठेकरे बोहरले जनाएका छन्।
दुवै पालिकाका जनप्रतिनिधि, कर्मचारी तथा सरोकारवालाको सहभागितामा सम्पन्न बैठकले साझा योजना तथा कार्यक्रमहरूलाई आगामी आर्थिक वर्षदेखि लागू गर्ने, सीमावर्ती मुद्दामा समन्वयकारी भूमिका बढाउने र आपतकालीन अवस्थामा दुवै पालिकाले साझा प्रतिक्रिया प्रणाली तयार गर्ने निर्णयसमेत गरेको छ।
अपिहिमाल र मार्मा गाउँपालिकाबीच भएको यो समन्वय बैठकलाई स्थायी सहकार्यका लागि महत्वपूर्ण मोडको रूपमा लिइएको छ। स्थानीय तहमा सहकार्यको अभ्यास बढ्दै जाँदा विकास, सेवाप्रवाह र स्थानीय सुशासनमा सकारात्मक प्रभाव पर्ने विश्वास व्यक्त गरिएको छ।
कार्यक्रम अपिहिमाल गाउँपालिकाको केन्द्र मा सम्पन्न भएको र मार्मा गाउँपालिका का अध्यक्ष जमन सिंह धामी, उपाध्यक्ष सर्मिला सिंह लगायत पालिकाको टिम सहित अपिहिमाल पुगेको अपिका अध्यक्ष बोहोराले बताए।
