धनगढी — अपिहिमाल गाउँपालिका र धनगढी उपमहानगरपालिका बीच भगिनी सम्बन्ध स्थापना गर्ने सहमति भएको छ। बिहीबार धनगढीमा भएको भेटमा दुवै स्थानीय निकायबीच पर्यटन विकास, रोजगारी तथा क्षमता विकासजस्ता क्षेत्रमा सहकार्य गर्ने सम्झौता भएको हो।
अपिहिमाल गाउँपालिकाका अध्यक्ष भगत सिंह ठेकरेको नेतृत्वमा सहभागी टोलीले धनगढी उपमहानगरपालिकाका मेयर गोपी हमालसँग छलफल गरी आपसी समन्वय र सहकार्यमा पहल बढाउने निर्णय गरेका छन्।
यसअन्तर्गत आगामी दिनमा धनगढीले आयोजना गर्ने रोजगार मेला र सिपमूलक तालिमहरूमा अपिहिमालका युवाहरूको सहभागिता सुनिश्चित गरिने छ। त्यस्तै, निकट भविष्यमा धनगढीका जनप्रतिनिधि तथा कर्मचारीहरूको टोलीले अपिहिमालको भ्रमण गर्ने छलफल पनि भएको छ।
मेयर हमालले गाउँपालिकासँगको सहकार्यलाई क्षेत्रीय विकासको लागि ऐतिहासिक कदम बताउँदै साझा परियोजनाहरूमा काम गर्ने प्रतिवद्धता जनाएका छन्।
#gatishilnews
